কৃষি আৰু সংসাধিত খাদ্য সামগ্ৰী ৰপ্তানি উন্নয়ন প্ৰাধিকৰণৰ (এপেডা) সহযোগত অষ্ট্ৰিয়া আৰু নেদাৰলেণ্ডছলৈ ৰপ্তানিৰ বাবে বুধবাৰে ত্ৰিপুৰাৰ পৰা ১৮ মেট্ৰিক টন ওজনৰ চাৰিটা প্ৰজাতিৰ এনপিঅপি-প্ৰমাণিত থলুৱা চাউলৰ এক চালান আনুষ্ঠানিকভাবে ৰপ্তানিৰ শুভাৰম্ভ কৰা হয়। এই ৰপ্তানিয়ে স্থানীয় কৃষকসকলৰ বাবে নতুন বজাৰৰ সুযোগ সৃষ্টি কৰাৰ দিশত আৰু সুসংগঠিত তথা ৰপ্তানি-মুখী উৎপাদনৰ জৰিয়তে আন্তঃৰাষ্ট্ৰীয় বজাৰৰ সৈতে ত্ৰিপুৰাৰ সংযোগ সুদৃঢ় কৰাত এক গুৰুত্বপূৰ্ণ পদক্ষেপ চিহ্নিত কৰিছে।
এনপিঅপি-প্ৰমাণিত থলুৱা চাউলৰ এই চালানত চাৰিটা প্ৰজাতি অন্তৰ্ভুক্ত হৈ আছে: সুগন্ধি কালি খাচা চাউল, সুগন্ধি হৰিনাৰায়ণ চাউল, বিৰন চাউল (বগা বৰা চাউল) আৰু মাইমি হাংগা চাউল (ক’লা চাউল)। 'ত্ৰিপুৰা ষ্টেট অৰ্গেনিক ফাৰ্মিং ডেভেলপমেণ্ট এজেন্সী'ৰ (TSOFDA) পৃষ্ঠপোষকতাত ত্ৰিপুৰাৰ কৃষক উৎপাদক প্ৰতিষ্ঠানসমূহৰ (এফপিচি) পৰা এই চাউল সংগ্ৰহ কৰা হৈছে আৰু বিশ্বজুৰি ভাৰতীয় জৈৱিক কৃষি-সামগ্ৰীৰ অন্যতম নেতৃত্বস্থানীয় ৰপ্তানিকাৰী প্ৰতিষ্ঠান চোনেপটৰ 'মেছাৰ্ছ প্ৰতীতি অৰ্গেনিক ফুডছ'ৰ জৰিয়তে এই ধান ৰপ্তানি কৰা হৈছে।
এই পদক্ষেপে স্থানীয় উৎপাদক আৰু এফপিচিসমূহক আন্তঃৰাষ্ট্ৰীয় বজাৰৰ সৈতে একত্ৰিত কৰাৰ এক পথ প্ৰদান কৰাৰ লগতে প্ৰমাণিত জৈৱিক সামগ্ৰীৰ বৰ্ধিত গোলকীয় চাহিদাত ৰাজ্যখনৰ অংশগ্ৰহণক শক্তিশালী কৰে। এই ৰপ্তানিৰ সুযোগে অংশগ্ৰহণকাৰী কৃষকসকলক দেশীয় বজাৰৰ তুলনাত ৪০% লৈকে অধিক মূল্য লাভ কৰাত সহায় কৰিব বুলি আশা কৰা হৈছে, যিয়ে কৃষকসকলক সুসংগঠিত আৰু ৰপ্তানি-মুখী উৎপাদনত অংশগ্ৰহণ কৰিবলৈ এক উল্লেখনীয় অৰ্থনৈতিক প্ৰেৰণা প্ৰদান কৰিব।
যোৱা মাহত এপেডাই ত্ৰিপুৰাত আয়োজন কৰা 'ৰিভাৰ্চ বায়াৰ-ছেলাৰ মিট'ৰ (RBSM) ওপৰত ভিত্তি কৰি এই শুভাৰম্ভণি কাৰ্যসূচী ৰূপায়ণ কৰা হৈছে, যিয়ে সম্ভাৱ্য আন্তঃৰাষ্ট্ৰীয় ক্ৰেতা আৰু স্থানীয় উৎপাদকসকলক একত্ৰিত কৰাৰ লগতে বজাৰৰ সুবিধা লাভৰ বাবে সংযোগ সৃষ্টিত সহায় কৰে। বৰ্তমানৰ এই ৰপ্তানি চালানে ক্ৰেতা-বিক্ৰেতাৰ এনে আলোচনাক কৃষক আৰু এফপিচিসমূহৰ বাবে প্ৰত্যক্ষ আন্তঃৰাষ্ট্ৰীয় ব্যৱসায়িক সুযোগলৈ পৰিৱৰ্তিত কৰা কাৰ্যক প্ৰতিফলিত কৰিছে।
অষ্ট্ৰিয়া আৰু নেদাৰলেণ্ডছলৈ ত্ৰিপুৰাৰ এনপিঅপি-প্ৰমাণিত চাউলৰ ৰপ্তানি অতি গুৰুত্বপূৰ্ণ, কাৰণ এইবোৰ হৈছে সজাগ আৰু গুণগত মান বিচৰা আন্তঃৰাষ্ট্ৰীয় বজাৰ, য’ত গুণবত্তা, খাদ্য সুৰক্ষা, প্ৰমাণীকৰণ আৰু অনুসৰণযোগ্যতা অতি গুৰুত্বপূৰ্ণ বিবেচনাৰ বিষয়।
ত্ৰিপুৰা চৰকাৰৰ কৃষি মন্ত্ৰী ৰতন লাল নাথ, এপেডাৰ অধ্যক্ষ অভিষেক দে আৰু ত্ৰিপুৰা চৰকাৰৰ কৃষি আৰু কৃষক কল্যাণ বিভাগৰ সচিব অপূৰ্ব ৰায়ে এই চালানৰ আনুষ্ঠানিক শুভাৰম্ভ কৰে। অনুষ্ঠানত এপেডাৰ সচিব ড° শাশ্বতী বসু, নাবাৰ্ডৰ মহা প্ৰৱন্ধক তনুশ্ৰী ভট্টাচাৰ্য, কৃষি সঞ্চালক ফণীভূষণ জমাতিয়া আৰু TSOFDA-ৰ মিছন সঞ্চালক শ্ ৰাজীৱ দেৱবৰ্মাৰ লগতে এপেডাৰ বিষয়া, ৰপ্তানিকাৰী আৰু লজিষ্টিক অংশীদাৰসকলৰ প্ৰতিনিধি আৰু অঞ্চলটোৰ প্ৰগতিশীল ধান খেতিয়কসকল উপস্থিত থাকে।
ত্ৰিপুৰা চৰকাৰৰ কৃষি মন্ত্ৰী ৰতন লাল নাথে কয় যে ত্ৰিপুৰাৰ পৰা আন্তঃৰাষ্ট্ৰীয় বজাৰলৈ এনপিঅপি-প্ৰমাণিত থলুৱা চাউল ৰপ্তানি কৰাটো ৰাজ্যখনৰ বাবে এক গৌৰৱৰ মুহূৰ্ত আৰু ই কৃষক, কৃষক উৎপাদক প্ৰতিষ্ঠান আৰু অন্যান্য অংশীদাৰসকলৰ পৰিশ্ৰমক প্ৰতিফলিত কৰিছে। জৈৱিক আৰু পৰম্পৰাগত কৃষি সামগ্ৰীৰ ক্ষেত্ৰত ত্ৰিপুৰাৰ অপাৰ সম্ভাৱনাৰ কথা উল্লেখ কৰি তেওঁ কয় যে এনে পদক্ষেপে কৃষকসকলক নতুন বজাৰ লাভ কৰাত, উন্নত মূল্য নিশ্চিত কৰাত আৰু বহনক্ষম জীৱিকা গঢ়ি তোলাত সহায় কৰিব। ৰাজ্য চৰকাৰে জৈৱিক কৃষি পৰিস্থিতিতন্ত্ৰ শক্তিশালী কৰিবলৈ আৰু আন্তঃৰাষ্ট্ৰীয় মানদণ্ড পূৰণ কৰাত উৎপাদকসকলক সহায় কৰিবলৈ প্ৰতিশ্ৰুতিবদ্ধ বুলিও তেওঁ উল্লেখ কৰে।
এপেডাৰ অধ্যক্ষ অভিষেক দেই কয় যে ত্ৰিপুৰাৰ পৰা এনপিঅপি-প্ৰমাণিত থলুৱা চাউল ৰপ্তানিয়ে ভাৰতৰ বৰ্ধিত জৈৱিক আৰু কৃষি ৰপ্তানিত অৰিহণা যোগোৱাৰ ক্ষেত্ৰত উত্তৰ-পূৰ্বাঞ্চলৰ অপাৰ সম্ভাৱনাক প্ৰদৰ্শন কৰিছে। তেওঁ আলোকপাত কৰে যে এফপিচি আৰু কৃষকসকলক আন্তঃৰাষ্ট্ৰীয় বজাৰৰ সৈতে সংযোগ কৰি আৰু প্ৰমাণীকৰণ, অনুসৰণযোগ্যতা আৰু গুণগত ব্যৱস্থা শক্তিশালী কৰি এপেডাই বহনক্ষম আৰু সুসংগঠিত ৰপ্তানিৰ সুযোগ সৃষ্টিত সহায় কৰিছে। তেওঁ আৰু কয় যে বিশ্ব বজাৰত ৰাজ্যখনৰ ব্যতিক্ৰমী কৃষি সামগ্ৰীসমূহৰ প্ৰচাৰৰ বাবে এপেডাই ত্ৰিপুৰা চৰকাৰ আৰু অন্যান্য অংশীদাৰসকলৰ সৈতে ঘনিষ্ঠভাৱে কাম কৰি যাব।
এই অনুষ্ঠানে ৰাজ্যখনৰ পৰা প্ৰমাণিত জৈৱিক সামগ্ৰীৰ ৰপ্তানি সম্প্ৰসাৰণ কৰা, আন্তঃৰাষ্ট্ৰীয় বজাৰৰ সৈতে কৃষকৰ সংযোগ শক্তিশালী কৰা আৰু কৃষক তথা উৎপাদকসকলৰ বাবে বহনক্ষম ৰপ্তানিৰ সুযোগ সৃষ্টি কৰাৰ ক্ষেত্ৰত এপেডা, ত্ৰিপুৰা চৰকাৰ আৰু জৈৱিক মূল্য শৃংখলাৰ অংশীদাৰসকলৰ সমন্বিত প্ৰচেষ্টাক প্ৰতিফলিত কৰে।
