ই-ক্ৰয় আৰু GeMক লৈ গুৱাহাটীত চাৰিদিনীয়া প্ৰশিক্ষণ কৰ্মশালা
এনইএইচএআৰআই–ব্ৰহ্মপুত্ৰ ব’ৰ্ডৰ উদ্যোগত ৰাজহুৱা ক্ৰয় ব্যৱস্থাত স্বচ্ছতাৰ ওপৰত গুৰুত্ব
গুৱাহাটী, ২৪ আগষ্টঃ ব্ৰহ্মপুত্ৰ ব’ৰ্ডৰ নৰ্থ ইষ্টাৰ্ণ হাইড্ৰ’লিক এণ্ড এলাইড ৰিচাৰ্ছ ইনষ্টিটিউট (এনইএইচএআৰআই)-এ পুনেৰ নেচনেল ৱাটাৰ একাডেমীৰ সহযোগত গুৱাহাটীত ‘ই-প্ৰকিউৰমেণ্ট এণ্ড GeM’ শীৰ্ষক চাৰিদিনীয়া প্ৰশিক্ষণ কৰ্মশালা অনুষ্ঠিত কৰে।
১৮ৰ পৰা ২১ আগষ্টলৈ অনুষ্ঠিত কৰ্মশালাখন ১৭ আগষ্টৰ পৰা ১৬ নৱেম্বৰলৈ চলিবলগীয়া তিনি মাহীয়া সামৰ্থ্য নিৰ্মাণ অভিযানৰ অংশ। ইয়াৰ লক্ষ্য হৈছে চৰকাৰী ক্ৰয় ব্যৱস্থাত স্বচ্ছতা, অখণ্ডতা, নৈতিকতা আৰু পেছাদাৰী দক্ষতা বৃদ্ধি কৰা।
কৰ্মশালাত চৰকাৰী ক্ৰয়ৰ নিয়ম-নীতি, GFR ২০১৭, টেণ্ডাৰ প্ৰক্ৰিয়া, মূল্যায়ন, চৰকাৰী ই-মাৰ্কেটপ্লেচ (GeM) আৰু CPP প’ৰ্টেলৰ ব্যৱহাৰ আদি বিষয়ত তাত্ত্বিক আৰু ব্যৱহাৰিক প্ৰশিক্ষণ প্ৰদান কৰা হয়।
ব্ৰহ্মপুত্ৰ ব’ৰ্ড আৰু ৰাষ্ট্ৰীয় জলবিদ্যা প্ৰতিষ্ঠানৰ মুঠ ২০গৰাকী অংশগ্ৰহণকাৰীক প্ৰশিক্ষণ সম্পূৰ্ণ কৰাৰ বাবে প্ৰমাণপত্ৰ প্ৰদান কৰা হয়। কৰ্মশালাখনে চৰকাৰী ক্ৰয় ব্যৱস্থাক অধিক দক্ষ আৰু স্বচ্ছ কৰি তোলাত সহায় কৰিব বুলি আশা প্ৰকাশ কৰা হৈছে।
