UPI ব্যৱহাৰকাৰীৰ পৰা কোনো মাচুল লোৱা নহ’ব
সাধাৰণ গ্ৰাহকৰ লেনদেন বিনামূলীয়া; সীমিত ব্যৱসায়িক লেনদেনতহে ভৱিষ্যতে MDR প্ৰযোজ্য হ’ব পাৰে
নতুন দিল্লী, ৮ আগষ্ট: UPI ব্যৱহাৰকাৰীৰ পৰা কোনো ধৰণৰ লেনদেন মাচুল লোৱা নহ’ব বুলি কেন্দ্ৰীয় চৰকাৰে স্পষ্ট কৰি দিছে। চৰকাৰে প্ৰকাশ কৰা তথ্য অনুসৰি, ব্যক্তি-ব্যক্তিৰ (P2P) সকলো UPI লেনদেন বিনামূলীয়াই থাকিব। সাধাৰণ গ্ৰাহকৰ দৈনন্দিন UPI লেনদেনতো কোনো মাচুল আৰোপ কৰা নহ’ব।
Payment and Settlement Systems Act (PSS Act), 2007-ৰ সংশোধনক লৈ সৃষ্টি হোৱা বিভ্ৰান্তিৰ মাজতে চৰকাৰে এই স্পষ্টীকৰণ আগবঢ়াইছে। চৰকাৰৰ মতে, সংশোধনটো UPI ব্যৱহাৰকাৰীৰ ওপৰত মাচুল আৰোপ কৰাৰ ব্যৱস্থা নহয়; বৰং UPI ব্যৱস্থাটোৰ দীৰ্ঘম্যাদী স্থায়িত্ব, প্ৰযুক্তিগত উন্নয়ন, চাইবাৰ সুৰক্ষা আৰু উদীয়মান বিপদৰ বিৰুদ্ধে প্ৰতিৰোধ ক্ষমতা শক্তিশালী কৰাৰ বাবে এক ‘Enabling Provision’।
চৰকাৰে জনোৱা মতে, ভৱিষ্যতে যদি Merchant Discount Rate (MDR) প্ৰৱৰ্তন কৰা হয়, তেন্তে সেয়া কেৱল নিৰ্দিষ্ট সীমাৰ ওপৰৰ সীমিত সংখ্যক ব্যৱসায়িক লেনদেনৰ ক্ষেত্ৰতহে প্ৰযোজ্য হ’ব। এই মাচুলৰ হাৰো নামমাত্ৰ আৰু ডেবিট বা ক্ৰেডিট কাৰ্ডৰ MDRতকৈ যথেষ্ট কম হ’ব। UPI-ৰ সিংহভাগ ব্যৱসায়িক লেনদেন বিনামূলীয়াই থাকিব।
সংসদে Taxation and Other Laws (Amendment) Bill, 2026 গৃহীত কৰাৰ পাছত UPI আৰু Services Steering Committee-এ সম্ভাব্য MDR সম্পৰ্কে সিদ্ধান্ত গ্ৰহণ কৰিব বুলি চৰকাৰে জানিবলৈ দিছে।
চৰকাৰৰ মতে, UPI-ৰ লেনদেনৰ পৰিমাণ দ্ৰুতগতিত বৃদ্ধি পোৱাৰ ফলত চাইবাৰ সুৰক্ষা, জালিয়াতি প্ৰতিৰোধ আৰু আন্তঃগাঁথনিৰ নিৰন্তৰ উন্নীতকৰণৰ প্ৰয়োজন হৈছে। কেৱল চৰকাৰী ৰাজসাহায্যৰ ওপৰত নিৰ্ভৰ কৰি UPI-ৰ পৰৱৰ্তী পৰ্যায়ৰ বিকাশ অব্যাহত ৰখাটো সম্ভৱ নহয় বুলি উল্লেখ কৰি এক স্থায়ী আৰু আত্মনিৰ্ভৰশীল ব্যৱস্থাৰ প্ৰয়োজনীয়তাৰ কথাও চৰকাৰে প্ৰকাশ কৰিছে।
২০১৬-১৭ চনত আৰম্ভ হোৱা UPI-এ ভাৰতৰ ডিজিটেল লেনদেন ব্যৱস্থাত ব্যাপক পৰিৱৰ্তন আনিছে। চৰকাৰৰ তথ্য অনুসৰি, ২০২৬ চনৰ জুলাই মাহত UPI-ৰ জৰিয়তে ২,৩৬৬ কোটি লেনদেনৰ বিপৰীতে মুঠ ২৯.৯ লাখ কোটি টকাৰ লেনদেন সম্পন্ন হয়। বৰ্তমান UPI ১১খন বিদেশী দেশতো সক্ৰিয় হৈ আছে।
কেন্দ্ৰীয় চৰকাৰে পুনৰ স্পষ্ট কৰি কয় যে UPI সাধাৰণ নাগৰিকৰ বাবে বিনামূলীয়াই থাকিব আৰু ভৱিষ্যতে কোনো MDR প্ৰৱৰ্তন কৰা হ’লেও সেয়া সীমিত ব্যৱসায়িক লেনদেনৰ ক্ষেত্ৰত নামমাত্ৰ হাৰতহে প্ৰযোজ্য হ’ব। নাগৰিকসকলক UPI সম্পৰ্কীয় তথ্যৰ বাবে বিত্ত মন্ত্ৰালয়, ভাৰতীয় ৰিজাৰ্ভ বেংক (RBI) আৰু NPCI-ৰ চৰকাৰী তথ্যৰ ওপৰতহে নিৰ্ভৰ কৰিবলৈ আহ্বান জনোৱা হৈছে।
