সাংবাদিক প্ৰফুল্ল কুমাৰ দাস: অসম-বাংলাদেশ সীমান্তৰ ধুবুৰী জিলাৰ জিনকাটা সত্ৰত প্ৰতিবছৰৰ দৰে এইবাৰো জগতগুৰু শ্ৰীমন্ত শংকৰদেৱ সাংস্কৃতিক বিকাশ কেন্দ্ৰৰ উদ্যোগত সাতদিনীয়া শঙ্কৰী নৃত্য, খোলবাদন আৰু বৰগীতৰ কৰ্মশালা অনুষ্ঠিত হয়।
কৰ্মশালাত শতাধিক যুৱক-যুৱতী, ছাত্ৰ-ছাত্ৰী আৰু বাপ-আইয়ে অংশগ্ৰহণ কৰে। প্ৰশিক্ষক হিচাপে উপস্থিত থাকে শ্ৰীমন্ত শংকৰদেৱ সংঘৰ সংগীত শিক্ষক দ্ৰৌপদী ৰায় আই, পাৰ্বতী ভকত আই আৰু জয়ন্ত ভকত বাপ।
ইফালে, জিনকাটা সত্ৰত নিয়মীয়াকৈ নাম-প্ৰসংগ আৰু ভাগৱত পাঠ অনুষ্ঠিত হৈ অহাৰ লগতে কৰ্মশালাখনত স্থানীয় ৰাইজৰ ব্যাপক সমাগম ঘটে। সহস্ৰাধিক ভক্ত, বাপ-বান্ধৱ আৰু আই-মাতৃৰ উপস্থিতিয়ে সীমান্তৱৰ্তী অঞ্চলটোত শঙ্কৰী সংস্কৃতিৰ প্ৰতি থকা গভীৰ আস্থা আৰু আগ্ৰহৰ কথাকে প্ৰতিফলিত কৰে।
ধুবুৰী জিলাক লৈ বিভিন্ন সময়ত উত্থাপিত বিতৰ্কৰ মাজতে জিনকাটা সত্ৰৰ এই সাংস্কৃতিক চৰ্চাই অঞ্চলটোৰ অসমীয়া বৈষ্ণৱ সংস্কৃতিৰ সমৃদ্ধ ঐতিহ্যৰ এক উজ্জ্বল নিদৰ্শন দাঙি ধৰিছে।
