ভাৰতৰত্ন ড° ভূপেন হাজৰিকাৰ জন্মশতবৰ্ষ উদযাপন উপলক্ষে শতাধিক কণ্ঠত "মানুহ মানুহৰ বাবে জীৱন জীৱনৰ বাবে, অকণমান সহানুভূতি কি মানুহে পাব নোৱাৰে" গীতটি শেহতীয়াকৈ নেপালত হোৱা প্ৰাকৃতিক দুৰ্যোগত নিহতসকলৰ স্মৃতিত আৰু আহতসকলৰ আশু আৰোগ্য কামনাৰে উৎসৰ্গা কৰে শ্রীভূমিৰ আগশাৰীৰ সামাজিক-সাংস্কৃতিক সংগঠন "খুশী স্মৃতি সংস্থা"ই।মঙলবাৰে সন্ধিয়া শুভ লগ্নত মাংগলিক বন্তি প্ৰজ্বলনেৰে আৰু ভূপেন হাজৰিকাৰ প্ৰতিচ্ছবিত মাল্যাৰ্পণেৰে "শতকণ্ঠে ভূপেন হাজৰিকা" অনুষ্ঠানৰ শুভাৰম্ভ কৰে শ্রীভূমিৰ প্ৰবীণ সাংবাদিক তথা প্ৰেছ ক্লাবৰ প্ৰাক্তন সভাপতি সতু ৰায়, প্ৰাক্তন সাংসদ মিছন ৰঞ্জন দাস, শিল্পী-সমাজকৰ্মী সিদ্ধাৰ্থ শেখৰ পাল চৌধুৰী, বিশিষ্ট ব্যৱসায়ী দুলাল দেব, সংস্থাৰ সভানেত্ৰী সুলেখা দত্ত চৌধুৰী, সৌমিত্ৰ পাল, অসিত দত্ত, অমৃতলাল বণিক, পৌৰ আয়ুক্ত ছন্দা ৰায় সিং প্ৰমুখে।অনুষ্ঠানৰ আৰম্ভণিতে ভূপেন হাজৰিকাৰ জন্মশতবৰ্ষ আৰু তেখেতৰ জীৱনৰ বিভিন্ন দিশ সন্দৰ্ভত আলোচনা কৰি মুখ্য বক্তা, বিশিষ্ট কলামিষ্ট তথা প্ৰেছ ক্লাবৰ প্ৰাক্তন সভাপতি সতু ৰায়ে কয়, কালজয়ী মানৱীয় দৰ্শনৰ বাবে বৰ্তমানৰ সামাজিক-ৰাজনৈতিক প্ৰেক্ষাপটত ভাৰতৰত্ন ড° ভূপেন হাজৰিকা অত্যন্ত প্ৰাসংগিক। ভূপেন হাজৰিকাৰ জন্ম হৈছিল ১৯২৬ চনৰ ৮ ছেপ্টেম্বৰত, যাৰ বাবে বৰ্তমান বিশ্বজুৰি তেখেতৰ জন্মশতবৰ্ষ উদযাপন কৰা হৈছে।তেওঁ কয়, বৰ্তমানৰ অস্থিৰ আৰু বিভক্ত বৈশ্বিক তথা আঞ্চলিক প্ৰেক্ষাপটত ভূপেন হাজৰিকাৰ গীত আৰু চিন্তাধাৰাৰ অতি প্ৰয়োজন। যেতিয়া দক্ষিণ এছিয়াসহ সমগ্ৰ বিশ্বতে জাতিগত, ধৰ্মীয় আৰু ভাষাগত মেৰুকৰণ চৰম ৰূপ ধাৰণ কৰিছে, তেতিয়া সাম্প্ৰদায়িক সম্প্ৰীতি আৰু মানৱতাৰ সংকটৰ সময়ত ভূপেন হাজৰিকাৰ গীত সম্প্ৰীতিৰ অন্যতম ৰক্ষাকৱচ। তেখেতৰ বিখ্যাত সৃষ্টি "মানুহ মানুহৰ বাবে" গীতটিয়ে আজিৰ স্বাৰ্থপৰ আৰু ব্যক্তিকেন্দ্ৰিক সমাজক পুনৰ মানৱীয় হ'বলৈ আহ্বান জনায়। সমাজৰ পৰা হিংসা আৰু অসহিষ্ণুতা দূৰ কৰিবলৈ তেখেতৰ অহিংসা আৰু ভাতৃত্ববোধৰ বাণী প্ৰচাৰ কৰাটো আজি আটাইতকৈ জৰুৰী।সতু ৰায়ে আৰু কয়, ভূপেন হাজৰিকা আছিল ব্ৰহ্মপুত্ৰ আৰু গংগাৰ মিলন সেতু। তেওঁ অসমীয়া আৰু বাংলা দুয়োটা ভাষাতে সমানে জনপ্ৰিয় আছিল। বৰ্তমান ভূ-ৰাজনৈতিক সীমা আৰু কাঁইটীয়া তাঁৰ জটিলতাৰ বাবে দুয়োটা অঞ্চলৰ মাজত সাংস্কৃতিক আদান-প্ৰদানত যি দূৰত্বৰ সৃষ্টি হৈছে, তাক নোহোৱা কৰাত তেখেতৰ গীতেই সেতু হিচাপে কাম কৰি আছে। কলকাতাত দীৰ্ঘদিন থকা কালত তাতো তেওঁ সংগীতেৰে মানুহৰ মন জয় কৰিছিল। 'ও গংগা তুমি বইছ কেনে' গীতৰ প্ৰসংগ টানি তেওঁ কয়, সমাজৰ বিভিন্ন স্তৰৰ অনাচাৰ, অবিশ্বাস আৰু হানাহানিৰ বিৰুদ্ধে সচেতনতাৰ বাৰ্তা এই গীতত প্ৰতিফলিত হৈছে।ভূপেন হাজৰিকা কেৱল সুৰকাৰ বা গায়কেই নাছিল, তেওঁ এজন লেখকো আছিল। জাতিভেদ প্ৰথাৰ তেওঁ ঘোৰ বিৰোধী আছিল আৰু জাতি, ধৰ্ম, বৰ্ণৰ ভিত্তিত মানুহৰ মাজত বিভেদ সৃষ্টিৰ বিৰুদ্ধে তেওঁ লেখা আৰু গীতেৰে প্ৰতিবাদ জনাইছিল। বাঙালী হিন্দু, বাঙালী মুছলমান, অসমীয়া, মাৰোৱাৰীকে ধৰি বিভিন্ন ভাষা-ভাষী আৰু সম্প্ৰদায়ৰ লোকক একেটা ছাতিৰ তললৈ অনাৰ যি প্ৰয়াস তেওঁ কৰিছিল, তাৰ মূল লক্ষ্য আছিল মানুহৰ মাজত মনুষ্যত্ববোধ জগাই তোলা। সেয়ে তেখেতৰ জন্মশতবৰ্ষত তেখেতৰ গীত অধিককৈ মানুহৰ মাজলৈ লৈ যাবলৈ সকলোকে সংকল্পবদ্ধ হ'বলৈ তেওঁ আহ্বান জনায়।তেওঁ লগতে কয়, অসমৰ ভাৰত-বাংলা সীমান্ত জিলা শ্রীভূমিৰ আগশাৰীৰ সামাজিক-সাংস্কৃতিক সংগঠন খুশী স্মৃতি সংস্থাৰ উদ্যোগত আয়োজিত এই জন্মশতবৰ্ষৰ অনুষ্ঠানটোৱেই দক্ষিণ অসমত এতিয়ালৈকে এনে বৃহৎ পৰিসৰত ইমান সংখ্যক শিল্পীক লৈ আয়োজন কৰা প্ৰথম অনুষ্ঠান।প্ৰাক্তন সাংসদ মিছন ৰঞ্জন দাসে কয়, ড° ভূপেন হাজৰিকা কেৱল এজন সংগীত শিল্পীয়েই নাছিল, তেখেতৰ আৰু বহু পৰিচয় আছিল। সংগীতৰ জৰিয়তেই তেওঁ পদ্মশ্রী, ভাৰতৰত্নকে ধৰি বহু সন্মানেৰে সন্মানিত হৈ অসমৰ নাম উজলাইছিল। তেওঁ নিৰ্দলীয় প্ৰাৰ্থী হিচাপে বিধায়ক নিৰ্বাচিত হৈছিল, ইয়াৰ উপৰিও সামাজিক সেৱামূলক ক্ষেত্ৰত তেখেতৰ অৱদান পাহৰিব নোৱাৰি।এদিনৰ অনুষ্ঠানত শতাধিক শিল্পীয়ে ভূপেন হাজৰিকাৰ বিভিন্ন গীত পৰিৱেশন কৰি তেখেতক শ্ৰদ্ধাঞ্জলি জ্ঞাপন কৰে। মঞ্জুশ্রী চক্ৰৱৰ্তী, শ্রাৱণী পাল, বৰ্ণিতা সেন, মঞ্জুৰী চৌধুৰী, মৃত্যুঞ্জয় চক্ৰৱৰ্তী, অশোকতৰু চৌধুৰী, পূজা পাল, শ্যামা দাস ধৰ, উমা পাল, মৌচুমী দাস বণিক, অৰ্পিতা দাস ধৰ, বিষ্ণুপদ নাগ, ঝিমি ধৰ, অংকিতা পোদ্দাৰ, ৰাজলক্ষ্মী দাস, ৰিমা দেবকে ধৰি অতিথি আৰু সন্মানপ্ৰাপ্ত শিল্পীসকলক উত্তৰীয়ৰে আদৰণি জনোৱা হয়।এই উপলক্ষে ১১ গৰাকী শিল্পীক বিশেষভাৱে "ভূপেন স্মাৰক সন্মান" প্ৰদান কৰা হয়। সন্মানিত শিল্পীসকল হ'ল - শাশ্বতী ভট্টাচাৰ্য, কবিতা ৰায়, ৰণধীৰ ৰায়, ৰঞ্জিত চৌধুৰী, নীলিমা দেব, মিনতি ভট্টাচাৰ্য, শিৱানী ব্ৰহ্মচাৰী, সুব্ৰত খাজাঞ্চি, শেখৰ ৰঞ্জন শৰ্মা, অনুপম দেব আৰু সুকেশ মালাকাৰ (যি ভূপেন হাজৰিকাৰ সৈতে একেখন মঞ্চতে বাদ্যযন্ত্ৰ বজাইছিল)।
